Psa 31 | NdeIBE | STEP | Kumqondisi wokuhlabela. Ihubo likaDavida Kuwe Jehova, sengifumene isiphephelo; mangingayangiswa lanini; ngikhulula ngokulunga kwakho.

Psalms 31

1 Kuwe Jehova, sengifumene isiphephelo; mangingayangiswa lanini; ngikhulula ngokulunga kwakho.

2 Ngipha indlebe yakho, woza ngokuphangisa ungihlenge; woba lidwala lami lokuphephela, inqaba eqinileyo yokungisindisa.

3 Njengoba ulidwala lami lenqaba yami, ngikhokhela ungihole ngenxa yegama lakho.

4 Ngikhulula emjibileni othiyelwe mina, ngokuba uyisiphephelo sami.

5 Ezandleni zakho nginikela umphefumulo wami; ngihlenga, O Jehova, Nkulunkulu weqiniso.

6 Ngiyabazonda labo abanamathela izithombe zeze; ngithemba kuJehova.

7 Ngizathaba ngijabule othandweni lwakho, ngokuba wakubona ukuhlupheka kwami wabazi ubuhlungu bomphefumulo wami.

8 Kawungifuqelanga esitheni kodwa ugxilise izinyawo zami endaweni ebanzi.

9 Woba lomusa kimi, O Jehova, ngokuba ngiyahlupheka; amehlo ami ayafiphala ngenxa yosizi, umphefumulo wami lomzimba wami ngokudabuka.

10 Impilo yami incitshiswa yikukhathazeka. leminyaka yami yikububula; amandla ami ayadeda ngenxa yokuhlupheka kwami, lamathambo ami aphela amandla.

11 Ngenxa yezitha zami, sengiyinhlekisa enjani kubomakhelwana; sengiyinunu kubangane bami – labo abangibonayo ezindleleni bayangibalekela.

12 Sebekhohliwe ngami kungathi sengafa; senginjengembiza yebumba ehlephukileyo.

13 Ngokuba ngizwa izingoma zabanengi; kulezisongo inxa zonke; bakha amasu okungilimaza, njalo baceba ukuchitha impilo yami.

14 Kodwa ngiyethemba kuwe, Jehova; ngithi, “UnguNkulunkulu wami.”

15 Izikhathi zami zisezandleni zakho; ngisindisa ezitheni zami lakulabo abangizingelayo.

16 Ubuso bakho mabukhazimule encekwini yakho; ngisindisa ngothando lwakho olungehlulekiyo.

17 Mangingahlaziswa, O Jehova, ngokuba sengikhalile kuwe; kodwa akuthi ababi bathelwe ngehlazo balale bathule zwi ethuneni.

18 Akuthi izindebe zabo zamanga zithuliswe, ngoba bathi ngokuzigqaja lokweyisa kwabo bakhulume ngobuqholo ngabantu abalungileyo.

19 Kukhulu kangakanani ukulunga kwakho okugcinele labo abakwesabayo, okunika obala abantu bebona kulabo abaphephela kuwe.

20 Uyabafihla ekusithekeni kobukhona bakho baphe amaqinga abantu; ekhaya lakho uyabagcina bevikelwe ezilimini ezichothozayo.

21 Udumo alube kuJehova ngoba watshengisa uthando lwakhe olumangalisayo kimi ngisedolobheni elihanqiweyo yimpi.

22 Ngiphakathi kokwethuka ngathi, “Sengisusiwe kangisabonakali kuwe!” Kanti wakuzwa ukukhala kwami ngicela umusa, lapho ngangicela kuwe ukusizwa.

23 Mthandeni uJehova, lina bangcwele bakhe! UJehova uyabalondoloza abathembekileyo, kodwa abazigqajayo uyabaphindisela ngokugcweleyo.

24 Qinani lime isibindi, lonke lina elithemba uJehova.